ერიკ ფრენკ რასელი (1905-1978) - ბრიტანელი ფანტასტი მწერალია. იგი წერდა ფანტასტიკურ უცნაურ ზღაპრებსა და ფანტასტიკის ჟანრის არამხატვრულ სტატიებს. მისი ნაწარმოებების დიდი ნაწილი პირველად გამოქვეყნდა შეერთებულ შტატებში. რასელის გმირი უმეტესად მარტოხელა ადამიანია, რომელიც ეწინააღმდეგება უცხოპლანეტელთა რთულ ბიუროკრატიას. მართალია, იგი იუმორისტულ ჟანრში გადმოგვცემს სათქმელს, თუმცა მის შემოქმედებას უფრო ღრმა და სერიოზული ელფერი დაჰკრავს, რაც კაცობრიობის მცდელობებისა და მისწრაფებების სულიერი ასპექტებითაა განპირობებული. 1955 წელს მისი იუმორისტული მოთხრობა "ალამაგუსა" წლის საუკეთესო მოკლე სამეცნიერო ფანტასტიურ მოთხრობად დასახელდა.
ერიკ ფრენკ რასელი
ალამაგუსა
(თარგმნა გიორგი კაკაბაძემ)
კოსმოსურ ხომალდ ბასტლერის ბორტზე კარგა ხანია ასეთი სიჩუმე არ ყოფილა. იგი სირიუსის კოსმოსურ პორტში იდგა გაცივებული ძრავებით. კორპუსი მძიმე ბრძოლაგამოვლილ მოკრივესავით უამრავ ნაიარებს დაეფარა. ამას ობიექტური მიზეზები ჰქონდა - ბასტლერი ახალი დარბრუნებული გახლდათ გრძელი რეისიდან, რომელსაც უფათერაკო და უხიფათო ნამდვილად არ ეთქმოდა.
ახლა კი, კოსმოსურ პორტში, გიგანტურმა ხომალდმა როგორც იქნა დამსახურებული, დროებითი სიმშვიდე ჰპოვა. აღარსად იყო წუხილი, შფოთვა, იმედგაცრუება, მტკივნეული სირთულეები, რომლებიც თავისუფალი ფრენისას დღეში ორჯერ მაინც იჩენდნენ თავს. მხოლოდ სიჩუმე, სიწყნარე და მშვიდობა.
კაპიტანი მაკნაუტი სავარძელში იჯდა, ფეხები მაგიდაზე შემოეწყო და ნებივრობდა. ატომური ძრავები გამორთული იყო და პირველად მრავალი თვის შემდეგ მანქანების ჯოჯოხეთური ღრიალი აღარ ისმოდა. ბასტერის თითქმის მთელი ეკიპაჟი, ოთხასამდე ადამიანი, მზის სხივებით გაჩახჩახებულ დიდ ქალაქში უდარდელად ქეიფობდა. კაპიტანი მაკნაუტი ელოდა პირველი თანაშემწე გრეგორის ბორტზე დაბრუნდებას, რათა თავადაც დანტკბარიყო ნეონით განათებული ცივილიზაციის სიამეებით.
რა კარგია საბოლოოდ მყარ მიწაზე ფეხის დადგმა! გუნდს ეძლევა საშუალება გაერთოს, ასე ვთქვათ, ზედმეტი ორთქლი გამოუშვას, რასაც ყველა თავისებურად აკეთებს. უკან რჩება შფოთვა, პასუხისმგებლობა და საზრუნავი. კომფორტი და უსაფრთხოება ნამდვილი ჯილდოა კოსმოსში ხანგრძლივი ხეტიალის შემდეგ!
კაიუტაში რადიოოფიცერი ბურმანი შევიდა. იგი ეკიპაჟის ექვს წევრთაგან ერთ-ერთი იმათთაგანი გახლდათ, რომელიც იძულებული შეიქნა გემზე დარჩენილიყო და რომელსაც სახეზე ეწერა, რომ კარგად უწყოდა დროის გატარების სულ მცირე ოცი სხვადასხვა სასიამოვნო ვარიანტი.
- ახლახან მოვიდა რადიოგრამა, ბატონო, - თქვა მან და კაპიტანს ფურცელი გაუწოდა.
კაპიტანმა მაკნაუტმა რადიოგრამა გამოართვა, მაგიდიდან ფეხები ჩამოაწყო, გასწორდა, მეთაურის შესაფერის პოზა დაიკავა და ხმამაღლა წაიკითხა:
დედამიწა მთავარი სამმართველო ბასთლერს წერტილი.
დარჩით სირიპორტში შემდგომი ინსტრუქციების მიღებამდე წერტილი.
კონტრ-ადმირალი ვეინი წერტილი.
კესიდი ჩამოდის ჩვიდმეტ რიცხვში წერტილი.
ფელდმანი კოსმოსური ოპერაციების განყოფილება სირისექტორი.
კაპიტანს სახე გაუმკაცრდა, ფურცელს თვალი მოწყვიტა და ხმამაღლა ამოიოხრა.
- მოხდა რამე? - ჰკითხა ბურმანმა და იგრძნო, რომ რაღაც ვერ იყო მთლად რიგზე.
მაკნაუტმა მაგიდაზე დაწყობილ სამ პატარა წიგნზე მიანიშნა.
- შუა. გვერდი ოცი.
ბურმანმა რამდენიმე გვერდი გადაფურცლა და საჭირო აბზაცი იპოვნა: "უეინ უ. კესიდი, კონტრადმირალი. თანამდებობა ხომალდებისა და საწყობების მთავარი ინსპექტორი".
ბურმანმა ნეწყვი ძლივს გადაყლაპა.
- ეს ნიშნავს, რომ...
- დიახ, - დაუდასტურა მაკნაუტმა უკმაყოფილოდ. - ისევ ისე, როგორც სამხედრო სასწავლებელში. შეღებეთ და გახეხეთ, გაასუფთავეთ და გააპრიალეთ. _ არაფრისმთქმელი გამომეტყველება მიიღო და აუტანლად ოფიციალური ტონით წარმოთქვა: - კაპიტანო, თქვენს განკარგულებაში მხოლოდ შვიდას ოთხმოცდაცხრამეტი საავარიო რაციონია, ხოლო დავთარში რვაასია გატარებული. საბორტო ჟუნალში დანაკლისის შესახებ არაფერი წერია. სად არის ის? რა დაემართა მას? რატომ არ გააჩნია ეკიპაჟის ერთ-ერთ წევრს მთავრობის მიერ გაცემული და ოფიციალურად დარეგისტრირებული აჭიმები? განაცხადეთ მათი დაკარგვის შესახებ?
- რაღა მაინცდამაინც ჩვენთვის მოიცალა? - ჰკითხა ბურმანმა და სახეზე სასოწარკვეთა გამოესახა. - აქამდე არასდროს გვაქცევდა ყურადღებას!
- ზუსტადაც რომ მაგიტომ, - უპასუხა მაკნაუტმა და კედელს მოწამის იერით მიაშტერდა. - ჩვენი დასჯის ჯერი დადგა. - კაპიტნის არაფრისმთქმელი მზერა საბოლოოდ კალენდარზე შეჩერდა. - ჯერ კიდევ სამი დღე გვაქვს - ამ ხნის განმავლობაში ბევრის გამოსწორება შეიძლება. ახლა კი მეორე ოფიცერ პაიკს დაუძახე.
ბურმანი დანაღვლიანებული წავიდა. მალევე პაილიც გამოჩ. მისი სახის გამომეტყველება ნათლად ადასტურებდა ძველი ანდაზას - ცუდ ამბებს ფრთები აქვთო.
- გააფორმეთ მოთხოვნა ას გალონ უმაღლესი ხარისხის, მუქ ნაცრისფერ პლასტიკურ საღებავზე. და კიდევ დაგვჭირდება ოცდაათი გალონი თეთრი მინანქარი შიდა სათავსოებისათვის. სასწრაფოდ გაგზავნეთ დაკვეთა კოსმოსური პორტის საწყობში და დარწმუნდით, რომ საღებავი, საჭირო რაოდენობის ფუნჯებთან ერთად, დღეს საღამოს ექვს საათამდე მოგვაწოდონ. აიღეთ ყველა საწმენდი საშუალება, რაც მათ უქმად უყრიათ.
"ეკიპაჟს ეს არ მოეწონება", - აღნიშნა პაიკმა და სუსტი წინააღმდეგობის გაწევა სცადა.
- არა უშავს, შეეგუები და შეგიყვარდება, - დაარწმუნა მაკნაუტმა. - სუფთა, გაკრიალებული გემი დადებით გავლენას ახდენს ეკიპაჟის მორალურ მდგომარეობაზე - ზუსტად ასე წერია კოსმოსური სამსახურის წესდებაში. დროზე გააგზავნე მოთხოვნა საღებავზე. მერე ინვენტარის სიებიც მომიტანე. ინვენტარიზაცია კესიდის მოსვლამდე უნდა მოვასწროთ. როდესაც ის ჩამოვა, ვეღარ შევძლებთ დანაკლისის დაფარვას ან ჭარბი ნივთების გადაყრას.
- დიახ, ბატონო, - მიუგო პაიკმა და ლასლასით გავიდა კაიუტიდან.
მაკნაუტი სკამის საზურგეს მიყრდნობოდა და რაღაცას ბუტბუტებდა. გაურკვეველ გრძნობას შეეპყრო, რომ ბოლო წუთს მთელი ძალისხმევა წყალში ჩაეყრებოდა. ტაბელური საკუთრების დანაკლისი სერიოზული პრობლემაა, გარდა იმ შემთხვევისა, თუ ეს დანაკლისი წინა ანგარიშში არაა მითითებული. სიჭარბე - კიდევ უარესია. თუ პირველი შენახვის დაუდევრობაზე მიანიშნებს, მეორე სახაზინო ქონების წინასწარგანზრახული დატაცების ფაქტზე მეტყველებს, რომელიც მხოლოდ ხომალდის მეთაურის ხელშეწყობის პირობებშია შესაძლებელი.
ავიღოთ, მაგალითად, მძიმე კოსმოსური კრეისერ სვიფტის მეთაურის უილიამსის შემთხვევა, - კოსმოსი ჭორებითაა სავსე. მაკნაუტმა შეიტყო ამის შესახებ, როდესაც ბასტლერმა ბუტსს ჩაუფრინა. კრეისერ სვიფტის ბორტზე სატაბელო ქონების ინვენტარიზაციის დროს აღმოაჩინეს ელექტრიფიცირებული მესრების ასაწყობად საჭირო სადენების თერთმეტი კოჭა, მაშინ, როცა დავთრებში მხოლოდ ათი იყო მითითებული. საქმეში სამხედრო პროკურორის ჩაერევის შემდეგ გაირკვა, რომ მავთულის ეს ზედმეტი ხვეული, რომელიც, სხვათა შორის, განსაკუთრებულად მოთხოვნადია ზოგიერთ პლანეტაზე, არ ყოფილა მოპარული კოსმოსური სამსახურის საწყობებიდან და მიტანილი (კოსმოსური ჟარგონით - ტელეპორტირებული) ხომალდზე. მიუხედავად ამისა, უილიამსს საყვედური მაინც არ ასცდა, რამაც მის დაწინაურებას ხელი აშკარად არ შეუწყო.
მაკნაუტი ასეთი ფიქრებით იყო დაკავებული, როცა პაიკი დაბრუნდა სქელი საქაღალდით ხელში.
- სასწრაფოდ აპირებთ ინვენტარიზაციის დაწყებას, ბატონო?
- სხვა გზა არ გვაქვს, - ამოიხვნეშა კაპიტანმა და საბოლოოდ გამოემშვიდობა ქალაქში დასვენებასა და კაშკაშა სადღესასწაულო განათებას. - ამხელა ხომალდის საფუძვლიან გაჩხრეკას დიდი დრო დასჭირდება, ამიტომ ეკიპაჟის პირადი ქონების შემოწმებას ბოლოს ჩავატარებთ.
კაიტიდან გამოსული კაპიტანი ბასტლერის ქიმისკენ გაემართა; უკან მისდევდა პაიკი, რომელიც წამებულივით გამოიყურებოდა.
როცა მთავარ შესასვლელს ჩაუარეს ისინი ხომალდის ძაღლმა ფისლეიკმა შენიშნა. ორ ნახტომში ფისლეიკი მათთან გაჩნდა და უკან აედევნა. ეს უზარმაზარი ძაღლი, რომლის მშობლებიც ამოუწურავი ენთუზიაზმით გამოირჩეოდნენ, მაგრამ ნაკლებად ზრუნავდნენ ჯიშის სიწმინდის შენარჩუნებაზე, ეკიპაჟის სრულფასოვანი წევრი იყო და ამაყად ატარებდა საყელოს წარწერით "ფისლეიკი - კოსმ. ხომ. ბესთლერის საკუთრება". ძაღლი შესანიშნავად ასრულებდა თავის მოვალეობას - არ გაეჭაჭანებინა ხომალდზე ადგილობრივი მღრღნელები და შეეტყობინებინა ხიფათის შესახებ, რომელსაც ადამიანები ვერ გრძნობდნენ.
ჰოდა, მიაბიჯებდნენ დერეფანში სამივენი: წინ მაკნაუტი და პაიკი - მოვალეობისთვის თავგადადებული ადამიანების იერით, ხოლო უკან ფისლეიკი, რომელიც, მძიმედ სუნთქავდა და მზად იყო ნებისმიერი თამაშისათვის, რასაც შესთავაზებდნენ.
ქიმის განყოფილებაში შესვლისას მაკნაუტი პილოტის სავარძელში მოთავსდა და პაიკს საქაღალდე გამოართვა.
- შენ ჩემზე უკეთ იცნობ მთელ ამ სამზარეულოს - ჩემი ადგილი შტურმანის კაიუტაშია. ასე რომ, მე წავიკითხავ და შენ შეამოწმებ, არის თუ არა ეს საგანი ადგილზე. - კაპიტანმა საქაღალდე გახსნა და პირველი გვერდიდან დაიწყო:
- კ-1. მიმართულების კომპასი, ტიპი დ, ერთი.
"დიახ", თქვა პაიკმა.
- კ-2. მიმართულების და მანძილის ინდიკატორი, ელექტრონული, ჯი-ჯი ტიპის, ერთი.
- არის.
- კ-3. მარცხენა და მარჯვენა ბორტის გრავიმეტრული მზომები, კესინის მოდელი, ერთი წყვილი.
- არის.
ფისლეიკმა თავი მაკნაუტს კალთაზე დადო, სახეში თანამგრძნობი თვალებით შეაცქერდა და ჩუმად ამოიუყმუვლა. მან გაიაზრა, რითი იყო დასაქმებული ეს ორი ადამიანი. გულისგამაწვრილებელი კითხვა-პასუხები ძალიან მოსაწყენ თამაშად ეჩვენა. მაკნაუტმა ხელი დაადო პისლეიკს თავზე და დაუწყო ძაღლს ყურებთან ფხანა.
- კ-187. ქაფრეზინის ბალიშები, ორი, პირველი და მეორე პილოტის სავარძლებისათვის.
- არის.
იმ დროისთვის, როცა პირველი ოფიცერი გრეგორი გემზე ავიდა, მათ უკვე მიაღწიეს შიდა რადიოკავშირის პაწაწინა ოთახს და ბინდბუნდში იქექებოდნენ. გამოუთქმელი ზიზღით აღვსილმა ფისლეიკმა დიდი ხანია მიატოვა ისინი.
- მ-24. სათადარიგო დინამიკები, სამ დიუმიანი, ტ-2 ტიპის ექვსი ერთელისგან შემდგარი კომპლექტი, ერთი.
- არის.
გრეგორმა ოთახში შეიხედა, გაოცებისგან თვალები გაუფართოვდა და ჰკითხა:
- აქ რა ხდება?
- გენერალური ინსპექცია გველის მალე, - უპასუხა მაკნაუტმა და საათს დახედა. - მიდი შეამოწმე საღებავი მოიტანეს თუ არა და თუ არა, რატომ. შემდეგ მოდი აქ და შემოწმებაში დამეხმარე - პაიკს სხვა საქმეებიც აქვს.
- მაშ, ქალაქში სეირნობები დასრულდა?
- რა თქმა უნდა, სანამ ეს ცოცხებისა და სამზარეულოს უფროსი არ წავა. - კაპიტანი პაიკს მიუბრუნდა. - როცა ქალაქში იქნები, ეცადე, რაც შეიძლება მეტი ბიჭი იპოვნო და ხომალდზე დააბრუნო. არ მაინტერესებს არავითარი მიზეზი და ახსნა-განმარტება. ყოველგვარი ალიბისა და შეფერხების გარეშე. ეს ბრძანებაა!
პაიკის სახემ კიდევ უფრო უბედური გამომეტყველება მიიღო. გრეგორიმ გაბრაზებულმა შეხედა, გავიდა, ერთი წუთის შემდეგ დაბრუნდა და მოახსენა:
- საღებავი ოც წუთში მოვა. - და სევდიანი მზერა გააყოლა ოთახიდან გასულ პაიკს.
- მ-47. სატელეფონო კაბელი, დაგრეხილი, ეკრანირებული, სამი კოჭა.
- არის, - თქვა გრიგოლმა და გონებაში საკუთარი თავს შეუკურთხა - რაღა მაინცდამაინც ახლა დაბრუნდა ხომალზე!
სამუშაოები გვიან საღამომდე გაგრძელდა და მზის ამოსვლისასთანავე განახლდა. ამ დროისთვის, ეკიპაჟის სამი მეოთხედი უკვე მძიმედ შრომობდა როგორც გემის შიგნით, ისე მის გარეთაც, ყველას კატორღამისჯილი ადამიანების იერი ჰქონდა - დანაშაულისთვის, რომელიც დაგეგმეს, მაგრამ ჯერ არ ჩაუდენიათ.
ვიწრო დერეფნებში და გადასასვლელებში ადამიანები კიბორჩხალებივით ოთხ კიდურზე დახოხავდნენ, რაც კიდევ ერთი დასტური იყო იმ ფაქტისა, თუ როგორ უფრთხიან მიწიერი ცხოვრების უმაღლესი ფორმის წარმომადგენლები ახალ საღებავს. კაპიტანმა ყველას გასაგონად გამოაცხადა - პირველს ვინც ახალშენაღებ ზედაპირზე ლაქას დატოვებდა, ეს საქციელი დარჩენილი სიცოცხლის ათი წლის ფასად დაუჯდებოდა.
მეორე დღის ბოლოს კაპიტნის საშინელი წინათგრძნობამ ახდენა დაიწყო. ისინი უკვე გადიოდნენ სამზარეულოს აღჭურვილობის უახლესი ინვენტარის მეცხრე გვერდის ბოლოში. შეფ-მზარეული, ჟან ბლანშარი ადასტურებდა ჩამოთვლილი ნივთების არსებობას და რეალურ ხელმისაწვდომობას. და უცებ, გზის ორი მესამედის გავლის შემდეგ, ხატოვნად რომ ვთქვათ, რიფებს შეასკდნენ და სწრაფად იწყეს ჩაიძირვა.
მაკნაუტმა სევდიანი ხმით ჩაილაპარაკა:
- ბ-1097. სასმელი წყლის დოქი, მინანქარით დაფარული, ერთი.
- აქ არის, - უპასუხა ბლანშარმა და ნივთზე თითით დააკაკუნა.
- ბ-1098. სქოლაკი, ერთი.
- რა? -ჰკითხა ბლანშარმა გაოცებისგან გაფართოებული თვალებით.
- ბ-1098. - სქოლაკი, ერთი, - გაიმეორა მაკნაუტმა. - რატომ მიყურებ ისე, თითქოს მეხი დაგეცა? განა ეს კამბუზი არაა? შეფმზარეული ხარ, თუ არა? შენზე უკეთ ვინ უნდა უწყოდეს, რა არის კამბუზში? მაშ, სადაა ეს სქოლაკი?
- პირველად მესმის მის შესახებ, - მკვახედ მიუგო მზარეულმა.
- შეუძლებელია. კამბუზის ინვენტარის ამ სიაში იგი შეტანილია და გარკვევითაა დაბეჭდილი - სქოლაკი, ერთი. საინვენტარო ნივთების სია ოთხი წლის წინ შეადგა, ხომალდის ექსპლუატაციაში გაშვების დღეს. ჩვენ თვითონ შევამოწმეთ სქოლაკის არსებობა და ხელიც მოვაწერეთ.
- მე არ მომიწერია ხელი არანაირ სქოლაკზე, - ჯიუტად გააქნია თავი ბლანშარმა. - ჩემს კამბუზში ასეთი რამ არაა.
- აჰა, ნახე! - ამ სიტყვებით მაკნაუტმა ხელში შეაჩეჩა მზარეულს ინვენტარის სია.
მზარეულმა დახედა და დაიჭყანა.
- მაქვს ელექტრო ღუმელი, ერთი. გარსაცმებით დაფარული მადუღარები, საზომი მოწყობილობით, ერთი კომპლექტი. არის ტაფა, ექვსი ცალი. აი, სქოლაკი კი არ მაქვს. არც კი მსმენია მის შესახებ. წარმოდგენაც არ მაქვს რა არის ეს. - ხელები გაასავსავა. - სქოლაკი არ მაქვს მეთქი!
- მაგრამ ის სადღაც ხომ უნდა იყოს, - არ ცხრებოდა კაპიტანი. - თუ კესიდი აღმოაჩენს, რომ სქოლარი გვაკლია, ჯოჯოხეთს მოგვიწყობს!
- მიდი და თავად ეძებე, - სარკასტულად ურჩია ბლანშარმა.
- მისმინე, ჟან, ხარ სასტუმროების საერთაშორისო ასოციაციის კულინარიული სკოლის დიპლომის მფლობელი, გაქვს სერთიფიკატი შეფ-მზარეულების კორდონ ბლეს კოლეჯიდან; ბოლო-ბოლო დაგაჯილდოვეს კოსმოსური ფლოტის კვების ცენტრის საპატიო დიპლომით, - შეახსენა მაკნაუტმა. - როგორ შეიძლება არ იცოდე, სადაა შენი სქოლაკი!
- ჯანდაბა! - დაიღიალა ბლანშარმა. - მეასედ ვიმეორებ, რომ არავითარი სქოლაკი არ მაქვს. და არასოდეს მქონია. თავად ესკოფიეც (ჟორჟ-ოგიუსტ ესკოფიე (1846-1935) - ფრანგი კულინარი, კრიტიკოსი, კულინარული მწერალი, ფრანგული სამზარეულოს ნოვატორი, მეტსახელად „მზარეულთა მეფე და მეფეთა მზარეული").
- ეს სქოლაკი სამზარეულოს საკუთრების ნაწილია, - არ ცხრებოდა მაკნაუტი. - და ის სადღაც უნდა იყოს, რადგან კამბუზის საინვენტარო სიის მეცხრე გვერდზეა ნახსენები. ეს კი ნიშნავს, რომ ის აქ უნდა იყოს და მის შენახვაზე პასუხისმგებელი შეფმზარეულია.
- შანსი არაა! შიდა კავშირის გამაძლიერებელიც ჩემია? - შეუღრინა ბლანშარმა და ჭერის მახლობლად მდებარე კუთხეში რკინის ყუთზე მიუთითა.
მაკნაუტმა წამით დაფიქრდა და მომრიგებლად უპასუხა:
- არა, ეს ბურმანის საკუთრებაა. მისი ნივთები მთელ ხომალდზე მიმობნეული.
- ჰოდა, ჰკითხე, სად წაიღო თავისი დაწყევლილი სქოლაკი! - დაუფარავი ტრიუმფით განაცხადა მზარეულმა.
- ასეც მოვიქცევი. თუ სქოლაკი შენი არაა, ის ბურმანს უნდა ეკუთვნოდეს. ჯერ სამზარეულო დავასრულოთ. თუ კესიდი შეამჩნევს უსისტემურობასა და უწესრიგობას, რიგითად ჩამომაქვეითებს. - კაპიტანმა კვლავ სიას დახედა. - ბ-1099. ძაღლის საყელური წარწერით, ტყავი, ბრინჯაოს ბალთით, ერთი. ძებნას ნუ დაუწყებ, ჟან. ახლახან ვნახე ძაღლზე. - მაკნაუტმა სიაში საყელოსთან პლიუსი დასვა და განაგრძო: - ბ-1100. ძაღლის კალათა, წნული, ერთი.
- აგერაა, - თქვა მზარეულმა და კალათა წიხლით მიაგდო კუთხეში.
- ბ-1101. ქაფრეზინის ბალიში, კომპლექტი კალათით, ერთი.
- ნახევარი ბალიშია, - შეუსწორა ბლანშარმა. - ოთხი წლის განმავლობაში ფისლეიკმა მეორე ნახევარი გაბრდღვნა.
- იქნებ კესიდიმ საწყობიდან ახლის გამოწერის უფლება მოგვცეს. კარგი, არ აქვს მნიშვნელობა. სანამ ნახევარი მაინც არის, ყველაფერი რიგზეა. - მაკნაუტი ფეხზე წამოდგა და დავთარი დახურა. - მაშ, ასე, სამზარეულო დავასრულეთ. მე წავალ ბურმანს დაველაპარაკები დაკარგული აღჭურვილობის შესახებ.
ბურმანმა რადიო მიმღები გამორთო, ყურსასმენები მოიხსნა და კაპიტანს შეაცქერდა.
- როცა კამბუზს ვათვალიერებდით, ერთი სქოლაკი მოვისაკლისეთ, - აუხსნა მაკნაუტმა. - როგორ ფიქრობ, სად შეიძლება იყოს?
- საიდან უნდა ვიცოდე? კამბუზი ბლანშარის სამეფოა.
- მთლად ეგრე არაა. შენი კაბელები კამბუზშიც გადის, იქვეა შენი ორი მიმღები, ავტომატური გადამრთველი და შიდა კავშირის გამაძლიერებელი. სქოლაკი სადაა?
- პირველად მესმის მის შესახებ, - მიუგო დაბნეულმა ბურმანმა.
- სისულელეებს ნუ როშავ! - დაიყვირა მოთმინებადაკარგულმა მაკნაუტმა. - ბლანშარის ბოდვებიც მეყოფა! ოთხი წლის წინ ჩვენ სქოლაკი გვქონდა, ეს ნამდვილად ასეა. ჩაიხედე ინვენტარის სიაში! ეს სია ხომალდის ქონების შემოწმებული ასლია და მასზე ჩემი ხელმოწერაა. ასე რომ, ხელი მოწერილია სქოლაკზეც. ამიტომ ის სადმე უნდა იყოს და კესიდის მოსვლამდე უნდა ვიპოვოთ.
- ძალიან ვწუხვარ, ბატონო, - თანაგრძნობა გამოხატა ბურმანმა, - მაგრამ მე ვერაფრით დაგეხმარებით.
- კიდევ ერთხელ დაფიქრდი, - ურჩია კაპიტანმა. - ქიმში რომაა მიმართულებისა და მანძილის მაჩვენებელი. რას ეძახით მაგათ?
- მიმანოს, _ უპასუხა ბურმანმა, ვერ მიხვდა, საითკენ მიჰყავდა მზაკვარი კაპიტანს.
- და ამას რას ეძახი? - განაგრძო მაკნაუტმა და მიუთითა პულსურ გადამცემზე.
- პულგას.
- ბავშვური სიტყვებია, ხომ? მიმანო და პულგა. ახლა მოიკრიბე გონება და გაიხსენე, რა ერქვა სქოლაკს ოთხი წლის წინ!
- რამდენადაც მე ვიცი, - უპასუხა ბურმანმა მცირე პაუზის შემდეგ, - ჩვენ არასდროს გვქონია სქოლაკის მსგავსი რამ.
- მაშინ, - ჰკითხა მაკნაუტმა, - რატომ მოვაწერეთ ხელი მასზე?
- მე ხელი არ მომიწერია. ყველგან თქვენ აწერდით ხელს.
- დიახ, როცა ხელმისაწვდომობას მიდასტურებდით. აშკარაა, რომ ოთხი წლის წინ კამბუზში ვთქვი: "სქოლაკი, ერთი" და ერთ-ერთმა თქვენგანმა, შენ ან ბლანშარდმა მომიგო: "არის". მე თქვენ სიტყვას ვენდე. სამსახურების უფროსებს ხომ უნდა ვენდო. მე ნავიგაციის სპეციალისტი ვარ, ვიცნობ ყველა სანავიგაციო მოწყობილობას, მაგრამ სხვას - არა. ამიტომ მიწევს იმ ადამიანის გამოცდილებაზე დაყრდნობა, ვინც იცის ან უნდა იცოდეს, რა არის სქოლაკი.
უცებ ბურმანს ბრწყინვალე აზრი გაუჩნდა.
- მისმინეთ, ხომალდის გადაკეთებისას, დერეფნებში, მთავარ შესასვლელთან და სამზარეულოში უამრავი სხვადასხვა მოწყობილობა და გაჯეტი იყო მიმოფანტული. გახსოვთ, რამდენი აღჭურვილობა დავახარისხეთ მათი შესაბამის ადგილებში დასამონტაჟებლად? ეს სქოლაკი შესაძლოა ახლა სადმე იყოს, და არა აუცილებლად ჩემთან ან ბლანშარდთან.
- სხვა ოფიცრებსაც დაველაპარაკები, - დაეთანხმა მაკნაუტი. - შესაძლოა გრეგორისთან, უორთთან, სანდერსონთან ან რომელიმე სხვასთან ვიპოვნოთ. როგორც არ უნდა იყოს, სქოლაკი უნდა მოიძებნოს. ან, თუ ვადა გაუვიდა და გამოუსადეგარი გახდა, შედგეს ჩამოწერის შესაბამისი ოქმი.
კაპიტანი ოთახიდან გავიდა. ბურმანმა, ყურსასმენები გაიკეთა და ისევ რადიოს მიუბრუნდა. დაახლოებით ერთი საათის შემდეგ მაკნაუტი მოღუშული სახით დაბრუნდა.
- ასეთი მოწყობილობა ნამდვილად არ არის ხომალდზე, - თქვა მან დაუფარავი გაღიზიანებით. - არავის სმენია მასზე, მეტიც, წარმოდგენაც კი არა აქვთ, რა შეიძლება იყოს.
- უნდა ამოშალოთ ინვენტარის სიიდან და შეატყობინოთ მისი დაკარგვის შესახებ, - შესთავაზა ბურმანმა.
- ეს მაშინ, როცა კოსმოსურ ნავსადგურში ვართ? შენ, ჩემი არ იყოს, იცი, რომ სახელმწიფო ქონების დაკარგვის ან დაზიანების ყველა შემთხვევა დაუყოვნებლივ უნდა ეცნობოს ბაზას. თუ კესიდის ვეტყვი, რომ სქოლაკი ფრენისას დაიკარგა, მაშინვე გაუჩნდება სურვილი ავუხსნა, სად, როდის და რა ვითარებაში მოხდა ეს და დაუყოვნებლივ რატომ არ მივაწოდე ინფორმაცია ამის შესახებ ბაზას. წარმოიდგინე სკანდალი, თუ მოულოდნელად აღმოჩნდება, რომ ეს ნივთი ნახევარი მილიონი ღირს. არა, ასე მარტივად ვერ მოვიშორებ ამ სქოლაკს.
- აბა, რა ვქნათ? - გულუბრყვილოდ იკითხა ბურმანმა და პირდაპირ კაპიტნის მიერ დაგებულ მახეში შეაბიჯა.
- მხოლოდ ერთი გზა დაგვრჩა! - განაცხადა მაკნაუტმა. - სქოლაკი უნდა ააწყო!
- ვინ, მე? - ამოიკვნესა დამფრთხალმა ბურმანმა.
- შენ - და სხვა არავინ! მით უმეტეს, რომ, თითქმის დარწმუნებული ვარ - სქოლაკი შენი საკუთრებაა.
- რატომ ფიქრობთ ასე?
- იმიტომ, რომ ეს ტიპიური ბავშვური სიტყვაა, ერთ-ერთი მათგანი, რომლის შესახებაც უკვე ვისაუბრეთ. მე მზად ვარ ფსონი დავდო ერთი თვის ხელფასზე, რომ სქოლაკი ერთგვარი მაღალმეცნიერული ალამაგუსაა. ალბათ ნისლთან აქვს რამე კავშირი. ვთქვათ, ბრმა დაშვების მოწყობილობა.
- ბრმა დაშვების ხელსაწყოს ფათურა ჰქვია, -ამცნო რადიოს ოფიცერმა კაპიტანს.
- აი, ხომ ხედავ! - წამოიძახა მაკნაუტმა, თითქოს ბურმანის სიტყვებმა დაადასტურა მისი თეორია. - მაშ, შეუდექი სამუშაოს და შექმენი დახვეწილი სქოლაკი. ხვალ საღამოს ექვს საათზე მზად უნდა იყოს და შესამოწმებლად ჩემს კაიუტაში მოიტან. და იზრუნე იმაზე, რომ სქოლაკი დამაჯერებლად გამოიყურებოდეს. განსაკუთრებით მუშაობის პროცესში.
ბურმანი ადგა, ხელები ჩამოუშვა და უხეში ხმით თქვა:
- როგორ გავაკეთო სქოლაკი, როცა არც კი ვიცი, როგორ გამოიყურება?
- ეს არც კესიდიმ იცის, - ღიმილით უპასუხა მაკნაუტმა. - მას უფრო რაოდენობა აინტერესებს და არა სხვა რამ. ის ითვლის ნივთებს, უყურებს მათ, ადასტურებს მათ არსებობას და ეთანხმება ექსპერტებს მათი ცვეთის ხარისხთან დაკავშირებით. ჩვენ მხოლოდ უნდა მოვიგონოთ დამაჯერებელი ალამაგუსა და ვუთხრათ ადმირალს, რომ ეს სქოლაკია.
- წმიდაო მოსე! - აღმოხდა ბურმანს.
- მოდი, ნუ ვიქნებით ბიბლიური პერსონაჟების საეჭვო დახმარების იმედზე, - გაკიცხა მაკნაუტმა. _ უმჯობესია გამოვიყენოთ რუხი ნივთიერება, რომლებიც ღმერთმა გვიბოძა. აიღე ახლავე შენი სარჩილავი და გამოაცხვე ხვალამდე უმაღლესი ხარისხის სქოლაკი. ეს ბრძანებაა!
საკუთარი თავით კმაყოფილი კაპიტანი ოთახიდან გავიდა. მარტო დარჩენილი ბურმანი ერთხანს კედელს მიშტერებოდა და მძიმედ ოხრავდა.
კონტრადმირალი უეინ კესიდი ზუსტად რადიოშეტყობინებაში მითითებული დროს გამოცხადდა. ეს გახლდათ სახეაწითლებული ღიპიანი მამაკაცი მკვდარი თევზის თვალებით.
- გამარჯობა, კაპიტანო, დარწმუნებული ვარ, რომ თქვენთან ყველაფერი რიგზეა.
- როგორც ყოველთვის, - იცრუა მაკნაუტმა თვალის დაუხამხამებლად. - ეს ჩემი მოვალეობაა. - მის ხმაში ურყევი თავდაჯერებულად იგრძნობოდა.
- მშვენივრია! - მოუწონა კესიდიმ. - ვაფასებ ოფიცრებს, რომლებიც სერიოზულად ეკიდებიან თავიანთ ეკონომიკურ პასუხისმგებლობას. სამწუხაროდ, ყველა ასეთი როდია.
ადმირალი საზეიმოდ ავიდა ტრაპზე და ხომალდში შეაბიჯა. მისი თევზის თვალების ყურადღება უმალვე მიიპყრო ახლად შეღებილმა ზედაპირმა.
- ინსპექტირების დაწყებას საიდან მირჩევთ, კაპიტანო, კიჩოდან თუ ქიმიდან?
- ინვენტარის სიები ქიმიდან იწყება და მიდის უკან, სერ. ამიტომ სჯობს ქიმით დავიწყოთ, ეს საქმეს გაამარტივებს.
- მშვენიერია!
ადმირალი ქიმისკენ გაემართა. გზად ფისლეიკს კისერზე შეაჩერა ხელი და საყელოს დახედა.
_ მოვლილი ძაღლია, კაპიტანო. არის მისგან რაიმე ხეირი ხომალდზე?
- ფისლეიკმა გადაარჩინა ეკიპაჟის ხუთი წევრის სიცოცხლე მარდიაზე. მან განგაში ატეხა, სერ.
- იმედი მაქვს, ამ ინციდენტის დეტალები არის საბორტო ჟურნალში დაფიქსირებული?
- კი ბატონო! საბორტო ჟურნალი თქვენი შემოწმების მოლოდინშია შტურმანის კაიუტაში.
- თავის დროზე მაგასაც შევამოწმებთ.
ქიმის განყოფილებაში შესვლისას კესიდი პირველი პილოტის სავარძელში მოკალათდა, კაპიტანის მიერ მიწოდებული საქაღალდე გადაშალა და კითხვას შეუდგა.
- კ-1. მიმართულების კომპასი, ტიპი დ, ერთი.
- აი, ბატონო, _ თქვა მაკნაუტმა და კომპასზე მიუთითა.
- კმაყოფილი ხარ მისი მუშაობით?
- კი ბატონო!
ინსპექტირება გაგრძელდა. ადმირალმა აღწერა შიდა საკომუნიკაციო კაიუტაში, კომპიუტერულ ოთახსა და სხვა ადგილებში განთავსებული აღჭურვილობა და ბოლოს კამბუზამდეც მიაღწია. კაშკაშა თეთრი, დაუთოებული ხალათში გამოწყობილი ბლანშარი ღუმელთან იდგა და დაუფარავი ეჭვით უმზერდა ადმირალს.
- ბ-147. ელექტრო ღუმელი, ერთი.
- აი, - თქვა მზარეულმა და თითი გაზქურისკენ გაიშვირა.
- კმაყოფილი ხარ მისი მუშაობით? – იკითხა კესიდიმ და მზარეულს თევზის თვალები მიაპყრო.
- ძალიან პატარა, - თქვა ბლანშარმა. - ყველაფერი ძალიან პატარაა. არ არის აქ საკმარისი სივრცე. ვერ მოტრიალდები. ეს კამბუზი ძაღლის ხუხულის სხვენს უფრო წააგავს.
- ეს ხომ სამხედრო ხომალდია და არა სამგზავრო ლაინერი, - თქვა კესიდიმ. წარბები შეჭმუხნა და ინვენტარის სიას დახედა. - ბ-148. ავტომატური საათი და ელექტრო ღუმელი ერთ ერთეულში, ერთ კომპლექტში.
- აგერ არიან, _ ცივად მიუგო ბლანშარმა. მზად იყო გადაეყარა ისინი უახლოესი ილუმინატორიდან, თუ, რა თქმა უნდა, კესიდი მათ საფასურს გადაიხდიდა.
ადმირალი სულ უფრო და უფრო წინ მიიწევდა, სიის დასასრულს უახლოვდებოდა და სამზარეულოში ნერვული დაძაბულობა თანდათან მატულობდა. ბოლოს კესიდიმ წარმოთქვა საბედისწერო ფრაზა:
- ბ-1098. სქოლაკი, ერთი.
- ჯანდაბა! - გაბრაზებულმა შესძახა ბლანშარმა. - უკვე ათასჯერ ვთქვი და კიდევ ვიმეორებ, რომ...
- სქოლაკი რადიოოთახშია, სერ, - სწრაფად ჩაერია მაკნაუტმა.
- მართლა? - კესიდიმ კიდევ ერთხელ დახედა სიას. - მაშინ რატომ არის მითითებული სამზარეულოს აღჭურვილობაში?
- ბოლო რემონტის დროს, სქოლაკი კამბუზში მოათავსეს, სერ. ეს არის ერთ-ერთი პორტატული მოწყობილობა, რომელიც შეიძლება დამონტაჟდეს იქ, სადაც მისთვის ადგილი მოიძებნება.
- ჰმ! მაშინ ის რადიოოთახის ინვენტარიზაციის სიაში უნდა შევიდეს. რატომ არ კეთდება ეს?
- თქვენი მითითებების მიღება მინდოდა, ბატონო.
თევზის თვალები ოდნავ გაბრწყინდა და მათში მოწონება გამოკრთა.
- დიახ, ალბათ მართალი ხართ, კაპიტანო. მე თვითონ გადავიტან სქოლაკს სხვა სიაში. - ადმირალმა პირადად გადახაზა მოწყობილობა მეცხრე სიიდან, ხელი მოაწერა, დაამატა მეთექვსმეტე სიაში და ხელახლა მოაწერა ხელი. - განვაგრძოთ, კაპიტანო. ბ-1099. საყელო წარწერით, ტყავი, ბრინჯაო... კარგი, კარგი, თავადაც ვნახე. ძაღლს ეკეთა.
ადმირალმა სიაში საყელოს გასწვრივ პლიუსი დასვა. ერთი საათის შემდეგ მან რადიო ოთახშიც შეაბიჯა, სადაც ბურმანი დახვდა. მიუხედავად იმისა, რომ გაჯგიმული იდგა, ხელები და ფეხები ოდნავ უკანკალებდა. მის დაჭყეტილ თვალებში ჩუმი ვედრება იკითხებოდა.
- ბ-1098. - სქოლაკი, ერთი, - თქვა კესიდიმ.
ცუდად აწყობილი რობოტის მოძრაობით, ბურმანი მრავალი შკალებით, გადამრთველებითა და ფერადი ნათურებით დახუნძლულ პატარა ყუთს შეეხო. გარეგნულად, მოწყობილობა რადიომოყვარულის მიერ შექმნილ წვენსაწურს წააგავდა. რადიოოფიცერმა ორი ტუმბლერი გადართო. ფერადი ნათურები გაცოცხლდნენ და დაიწყეს ციმციმი განათების სხვადასხვა კომბინაციით.
- აი, ეს არის, ბატონო, - გაჭირვებით ამოშაქრა ბურმანმა.
- აჰა! - კესიდი დაიხარა, რათა უკეთ დაეთვალიერებინა ნივთი. - რაღაც ასეთი მოწყობილობა არ მახსენდება. თუმცა ბოლო დროს მეცნიერება ისეთი ტემპით მიიწევს წინ, რომ ყველაფრის გახსენება შეუძლებელია. მუშაობს გამართულად?
- კი, ბატონო!
- ეს ერთ-ერთი ყველაზე სასარგებლო ინსტრუმენტია ხომალდზე, - ხაზგასმით დასძინა მაკნაუტმა.
- რა დანიშნულება აქვს? - ჰკითხა ადმირალმა და რადიოს ოფიცერს საშუალება მისცა, განებნია სიბრძნის მარგალიტები.
ბურმანი გაფითრდა.
მაკნაუტი დახმარება არ დააყოვნა.
- იცით, ადმირალო, დეტალურ ახსნას ძალიან დიდი დრო დასჭირდება, რადგან მოწყობილობა უკიდურესად რთულია, მაგრამ მოკლედ რომ ვთქვათ, სქოლაკი საშუალებას გვაძლევს დავამყაროთ სათანადო ბალანსი დაპირისპირებულ გრავიტაციულ ველებს შორის. ფერადი განათების სხვადასხვა კომბინაცია მიუთითებს გრავიტაციულ ველებში დისბალანსის ხარისხსა და ინტენსივობაზე ნებისმიერ მოცემულ მომენტში.
- ეს ძალიან ფაქიზი მოწყობილობაა და ემყარება ფინაგლეს კონსტანტას, 22 ფინაგლეს კონსტანტა - დინამიური ნეგატივების ფინაგლესეული კანონი. როგორც წესი ფორმულირებულია შემდეგნაირად: "ყოველივე, რაც შეიძლება წავიდეს უარესობისკენ, წავა უარესობისკენ - თანაც ყველაზე შეუფერებელ დროს." - დასძინა ბურმანმა, მოულოდნელად სასოწარკვეთილი გამბედაობით.
- მესმის, - თავი დაუქნია კესიდიმ, თუმცა, რა თქმა უნდა, ვერაფერი გაიგო. სავარძელში უფრო კომფორტულად მოთავსდა, სიაში სქოლაკის გვერდით პლიუსი დასვა და ინვენტარის აღწერა განაგრძო. - ც-44. კომუტატორი, ავტომატური, 40 შიდა საკომუნიკაციო ნომრისთვის, ერთი.
- აი, ბატონო.
ადმირალმა კომუტატორს გახედა და ისევ სიას ჩაუღრმავდა. ოფიცრებმა ამ მომენტით ისარგებლეს და სახიდან ოფლი ჩამოიწმინდეს.
ვაშა! გამარჯვება მოპოვებულია.
ყველაფერი კარგადაა.
ადმირალმა ბესტლერი ისეთმა კმაყოფილმა დასტოვა, კაპიტანისთვის კომპლიმენტები არ დაუშურვებია. საათიც არ იყო გასული, რომ მთელი ეკიპაჟი უკვე ქალაქში იყო გაქცეული და დაკარგულ დროს ინაზღაურებდა. მაკნაუტი და გრეგორი მონაცვლეობით ტკბებოდნენ ქალაქის მხიარული განათებებით. მომდევნო ხუთი დღის განმავლობაში გემზე სიმშვიდე და უდარდელობა სუფევდა.
მეექვსე დღეს ბურმანმა მეთაურის კაიუტაში რადიოგრამა მიიტანა, მაგიდაზე დადო და მაკნაუტის რეაქციას დაელოდა. რადიოოფიცერს სახეზე კმაყოფილება ეწერა, როგორც შეეფერება ადამიანს, რომელსაც სათანადოდ დაუფასდა ღვაწლი.
დედამიწის კოსმოსური ფლოტის სათაო ოფისი ბასთლერს წერტილი.
დაბრუნდით დაუყოვნებლივ კაპიტალური რემონტისთვის განახლებისთვის წერტილი.
დამონტაჟდება უახლესი ძრავა წერტილი.
ფელდმანი კოსმოსური ოპერაციების განყოფილება სირისექტორი.
- უკან დედამიწისკენ, - განაცხადა მაკნაუტმა ბედნიერი სახით. - კაპიტალური რემონტი მინიმუმ ერთთვიან შვებულებას ნიშნავს. - რადიო ოფიცერს გახედა. - გადაეცით ჩემი ბრძანება მორიგე ოფიცერს: სასწრაფოდ დააბრუნოს ბორტზე ქალქში მყოფი პირადი შემადგენლობა. როცა გამოძახების მიზეზს შეიტყობებენ, კისრისტეხით გამოიქცევიან.
- დიახ, ბატონო, - ჩაეცინა ბურმანს.
ორი კვირის შემდეგ, როდესაც სირიპორტი შორს მოიტოვეს და ხომალდის ქიმის ილუმინატორიდან მზე პაწაწინა წერტილადღა მოჩანდა ვარსკვლავური ცის კაბადონზე, მთელ ეკიპაჟს სახეზე ბედნიერი ღიმილი ეფინა. წინ იყო თერთმეტკვირიანი მგზავრობა, მაგრამ ამჯერად ლოდინი სასიამოვნო იყო. შინისაკენ მიფრინავდნენ! მააშ!
ღიმილი გაქრა, როცა ერთ საღამოს ბურმანმა ცუდი ამბავი მოიტანა. იგი კაპიტნთან შევიდა და შუა კაიუტაში შეყოვნდა. იდგა ერთხანს, ქვედა ტუჩს იკვნეტდა და ელოდა, როდის დაასრულებდა კაპიტანი წერას საბორტო ჟურნალში.
ბოლოს მაკნაუტმა ჟურნალი გვერდზე გადადო, ზევით აიხედა და ბურმანის დანახვისას წარბები შეეჭმუხნა.
- რა მოხდა? მუცელი გტკივა?
- არა, ბატონო. უბრალოდ ვფიქრობდი.
- რა, ასეთი მტკივნეულია ფიქრი?
- ვფიქრობდი და... - განაგრძო ბურმანმა მგლოვიარე ხმით. - დედამიწაზე ვბრუნდებით ძირითადი რემონტისთვის. გესმით ეს რას ნიშნავს? ჩვენ დავტოვებთ ხომალდს და ექსპერტების ურდო შეესევა მას. - ტრაგიკული მზერა ესროლა კაპიტანს. - ექსპერტების.
- ექსპერტების, რა თქმა უნდა, დაეთანხმა მაკნაუტი. - აბა, აპარატურას იდიოტების ჯგუფი ხომ ვერ დაამონტაჟებს და შეამოწმებს.
- ჩვენი სქოლაკის დამონტაჯებისა და დარეგულირებისათვის ცოდნა და კვალიფიკაცია ვის ეყოფა, ვერც კი წარმომიდგენია, შეახსენა ბურმანმა. - ამისთვის გენიოსი უნდა იყო.
მაკნაუტი ისე შეხტა, თითქოს ცხვირთან მუგუზალი მიუტანეს.
- ღმერთო ჩემო! სულ დამავიწყდა ეს ამბავი. მართლაც და, როდესაც დედამიწაზე დავბრუნდებით, ნაკლებად სავარაუდოა, რომ შევძლოთ ამ ბიჭების გაოგნება ჩვენი სამეცნიერო მიღწევებით.
- არა, ბატონო, არ გამოვა ეგ საქმე, - დაუდასტურა ბურმანმა. სახეზე ეწერა: „ამ ხათაბალაში შენ გამხვიე, ახლა კი კეთილი ინებე და თავადვე გამომიყვანე".
გარკვეული ხანი ელოდა, სანამ მაკნაუტი გამალებით ეძებდა გამოსავალს. ბოლოს ჰკითხა:
- მაშ, როგორ მოვიქცეთ, ბატონო?
უცებ კაპიტანს სახე გაებადრა და უპასუხა:
- დაშალე ეს ეშმაკის მანქანა და ჩააგდე დეზინტეგრატორში.
- ეს პრობლემას ვერ მოაგვარებს, ბატონო. ჩვენ მაინც ერთი სქოლაკით ნაკლები გვექნება.
- არაფერი მაგდაგვარი. დედამიწას შევატყობინებ, რომ ვერ გაუძლო კოსმოსური ფრენის რთულ პირობებს და მწყობრიდან გამოვიდა. - ნიშნისმოგებით ჩაუკრა თვალი ბურმანს. - ბოლოს და ბოლოს, ახლა თავისუფალ ფრენაში ვართ, არა? - ამ სიტყვებით, რადიოგრამის რვეულს დასწვდა და წერას შეუდგა, ბურმანის სახეზე მხიარული გამომეტყველება არც კი შეუმჩნევია:
კ. ხ. ბასთლერი კოსმოსური დედამიწის ფლოტის შტაბ-ბინას წერტილი.
ხელსაწყო ბ-1098 სქოლაკი დაიშალა შემადგენელ ნაწილაკებად ძლიერი გრავიტაციული წნევის ზემოქმედებით, ჰექტორ მეინორ მეიჯორის ორმაგი მზის სისტემის ველის გავლისას წერტილი.
მასალა გამოიყენებულ იქნა როგორც საწვავი რეაქტორისთვის წერტილი.
გთხოვთ ჩამოწეროთ წერტილი.
მაკნაუტი ბასთლერის მეთაური.
ბურმანი გამოვარდა კაპიტნის კაბინიდან და დაუყოვნებლივ გაგზავნა შეტყობინება დედამიწაზე. სრულ სიმშვიდეში გავიდა ორი დღე. მესამე დღეს ისევ კაპიტანთან მივიდა. ძალიან შეშფოთებულად გამოიყურებოდა.
- ცირკულარული რადიოგრამაა, სერ, - გამოაცხადა მან და ფურცელი გაუწოდა.
დედამიეის კოსმოსური ფლოტის შტაბი.
ყველა სექტორზე გადასაცემად წერტილი.
ძალიან სასწრაფო განსაკუთრებული მნიშვნელობის წერტილი.
ყველა ხომალდი დაუყოვნებლივ დაეშვას უახლოეს კოსმოპორტზე.
არ აფრინდეთ შემდგომ ინსტრუქტაჟამდე წერტილი.
უელინგი დედამიწის სამაშველო სამსახურის მეთაური.
- რაღაც მოხდა, - აღნიშნა მაკნაუტმა, თუმცა ოდნავადაც არ შეშფოთებულა. შტურმანის კაიუტისკენ გაემართა, ბურმანიც მას მიჰყვა. რუკები შეამოწმა და აკრიფა შიდა ტელეფონის ნომერი. პაიკს დაუკავშირდა და უთხრა:
- მისმინე, პაიკ, განგაშის სიგნალი მივიღეთ. ყველა ხომალდი დაუყოვნებლივ უბრუნდება უახლოეს კოსმოპორტს. ჩვენ ზაკსტედპორტში მოგვიწევს დაჯდომა, აქედან დაახლოებით სამი საფრენის დღეა. სასწრაფოდ შეცვალე კურსი, ჩვიდმეტი გრადუსით მარჯვნივ, დახრილობა ათი. - გაუთიშა და აწუწუნდა. - არასდროს მომწონდა ზაკსტედპორტი. ნამდვილი ნაგვის ყუთია. დალია ჩაილურის წყალი ჩვენმა ერთთვიანმა შვებულებამ. წარმომიდგენია, რა განწყობაზე იქნება გუნდი. თუმცა ამაში მათ ვერ დავადანაშაულებ.
- როგორ ფიქრობთ, რა მოხდა, ბატონო? - ჰკითხა ბურმანმა. რაღაცნაირად აფორიაქებული და გაღიზიანებული ჩანდა.
- მხოლოდ ღმერთმა უწყის. უკანსკნელი რადიოცირკულარი შვიდი წლის წინ გაიგზავნა, როდესაც სტარრეიდერი დედამიწასა და მარსს შორის შუა გზაზე აფეთქდა. შტაბმა ბრძანება გასცა, ყველა ხომალდი პორტებში დარჩენილიყო კატასტროფის მიზეზის დადგენამდე. - მაკნაუტმა ნიკაპი მოიფშვნიტა, ცოტა ხნით ჩაფიქრდა და განაგრძო: _ და მანამდე ერთი წლით ადრე კიდევ ერთი შემთხვევა იყო, როცა ბლოუგანის მთელი ეკიპაჟი გაგიჟდა. ყოველ შემთხვევაში, რაც არ უნდა იყოს, ეს სერიოზული ამბავია.
- იქნებ ეს კოსმოსური ომის დასაწყისია?
- ვისთან? - მაკნაუტმა უაზროდ აიქნია ხელი. - ჩვენი დონის ფლოტი არავის ჰყავს. არა, რაღაც ტექნიკურია. ადრე თუ გვიან მიზეზს გვეტყვიან. შესაძლოა, ზაქსტედში ჩასვლამდეც კი.
მართლაც, მალევე შეატყობინეს. სულ რაღაც ექვსი საათის შემდეგ, ბურმანი კაპიტნის სალონში გაფითრებული სახით შეიჭრა.
- რაღა მოხდა ახლა? - მკაცრად ჰკითხა მაკნაუტმა შეშფოთებულ რადიოს ოფიცერს.
- სქოლაკი... - ძლივს ამოღერღა ბურმანმა. ხელები ისე აუკანკალდა, თითქოს უხილავ ობობებს იშორებდა.
- მერე რა?
- ბეჭდვითი შეცდომა გაპარულა. ინვენტარიზაციის სიაში უნდა ყოფილიყო „ს. ქოფაკი".
კაპიტანმა უაზრო მზერით განაგრძობდა ბურმანის ცქერას.
- სქოფაკი? _ ჰკითხა დაბნეულმა.
- თავად ნახეთ! - ამ სიტყვებით ბურმანმა რადიოგრამა დააგდო მაგიდაზე და ისე სწრაფად გავარდა რადიოკაიუტიდან, კარის დაკეტვა კი დაავიწყდა. მაკნაუტმა რადიოგრამას დახედა:
დედამიწის კოსმოსური ფლოტის სათაო ოფისი ბასთლერს წერტილი.
ბ-1098 სახაზინო ქოფაკის ფისლეიკის სიკვდილის შესახებ თქვენს მოხსენებასთან დაკავშირებით წერტილი.
დაუყონებლივ შეგვატყობინეთ ყველა იმ გარემოების დეტალი, რომლებშიც ცხოველი შემადგენელ ნაწილაკებად დაიშალა ძლიერი გრავიტაციული წნევის ზემოქმედებით წერტილი.
გამოკითხეთ ეკიპაჟის წევრები და მოგვახსენეთ იმ სიმპტომებზე, რომლებიც აღენიშნებოდათ მათ კატასტროფის მომენტში წერტილი.
ძალიან გადაუდებელი უკიდურესად მნიშვნელოვანი უელინგი დედამიწის კოსმოსური ფლოტის სამაშველო სამსახური.
თავის კაიუტაში ჩაკეტილი მაკნაუტი ფრჩხილების კვნეტას მოჰყვა. დროდადრო გვერდულად დახედავდა, რათა შეემოწმებინა რამდენი გადაურჩა და ღრღნას განაგრძობდა.
Comments
Post a Comment